Saturday, November 3, 2012

සමාවෙයන් මට

                             




                                    ඇඳි වත 
                                   ගලවා දමා
                              වැතිරුණා සයනයේ
                                 ආත්මගත ඔහුගේ
                               මා වැසූ සෙවනැල්ල

                                    කුමක් කරම්ද
                                  කාලකන්නි මා,
                                   වැදු දරුවන්ගේ
                                  කුසගිනි නිවන්නට
                                               .
                                               .
                                               .
                                               .
                                               .
                                               .
                                               .
                                               .
                                               .
                                               .
                                               .

Friday, August 31, 2012

මාවතේ තනිවූ නැගණියට සෙනෙහසිනි !





සැදෑ කළුවර ගලන
අදුරු ගොම්මන් වෙලේ
නගේ නුඹ ඇයි තනිව
මේ වීදි කෙලවරේ
නගරයම සුර ලොවක
වෙස් ගන්න මේ පැයේ
හෙමි හෙමින් අඩි තියා
දසත නෙත් යොමන්නේ
නෙක පාට විදුලියට
නුඹ වශී වී වගේ

නගේ නුඹ දන්නවද ?

මතු පිටින් නුඹ දකින
මේ සුන්දරත්වය මැද්දෙ
මහ පොලොව නුහුලනා
අපරාධ මංකොල්ල
මේ නගරෙ සිදුවෙනව
උඹ උනත් තව ටිකෙන්
උන්ගෙ ගොදුරක් වෙන්න
බොහෝ විට ඉඩ තියේ

දයාබර නැගණියේ


නිශාචර හෝරාව
එලබෙන්න පෙරාතුව
අඩිය ඉක්මන කරල
හනි හනික ඉගිලියන්
පංති ගොස් පමා වුන
පොඩි එකී එනතුරා
ඉඳිකඩුලු ලඟට වී
අම්ම ඇති මඟ බලන්







Sunday, August 26, 2012

හොද ළමයෙක් වෙන්න දුවේ.....02

හොද ළමයෙක් වෙන්න දුවේ පළවෙනි ලිපිය කියවලා භාගෙට හොද ළමයි වෙලා හිටිය අය දැන් ආයෙම නරක ළමයි වෙලාද දන්නෙ නෑ. මොකද බට්ටි ඉතුරු පොස්ටුව දාන්න හුගක් පමා වුන නිසා. සමාවෙන්න ඕන ඒ ගැන හැමෝම.

ඔන්න එහෙනම් ඉතුරු ට්කත් බලල හොදම හොද ළමයි වෙන්නකෝ.....




17. යමක් කරන්නට පෙර සිතා බලන්න. තීරණයක් ගැනීමය පෙර විමසා බලන්න. ඉක්මන් නොවන්න.වඩාත් බොරු කියන්නේ කුඩා දරුවන් නොවන බව සිතට ගන්න.

18. සැබෑ මාර්ගය ඔබ ඉදිරියේ බව සිතට ගන්න. එහි පසුමගක් හෝ අතුරු මාර්ගයක් නැත. ඉදිරියට තැබූ පියවර පිටුපසට නොගන්න.

19. නිතරම යුතුකම් හා වගකීම් ගැන සිතන්න.
අපේ ජීවිතය නිතරම වගකීම් හා යුතුකම්වලින් පිරී ඇති බව මෙනෙහි කරන්න. ඒ යුතුකම් අවස්ථාවක් ලැබෙන හැම විටම ඉටුකරන්න. එවිට ලෝකය ඔබේ  සතුට කිසිදාක උදුරා නොගන්නා බව මතක තබාගන්න.

20. මෝඩකමට බෙහෙත් නැත.
මෝඩකමත් එක්තරා රෝගයකි. එහෙත් එම රෝගයට මෙතෙක් බෙහෙත් සොයාගෙන නැත. එහෙයින් මොඩකම් නොකරන්නත්, කල මෝඩකම් නැවත නොකරන්නත්, ඉන් පාඩමක් ඉගෙන ගන්නත් සිතට ගන්න.

21. අනුන් තුල ඇති ගුණ ගයන්නට තරම් ඔබ නිහතමානීවන්න. ජනප්‍රියවීමේ එක් රහසක් එය බව ඔබ නොදන්නවා විය හැක. තමා හා විශ්වාසයට කී රහස් කිසිසේත් පිට නොකරන්න. විශ්වාසවන්ත මිතුරියක් වීමේ අගය වටහාගන්න. 

22. තමා අභිමුඛයට එන බොහෝ දේ තම නුවණ නැමති තරාදියට දමා කිරා බලන්න. තරාදියේ බර ඇදෙන්නේ තම වාසි පැත්තටදැයි නිතර විමසිලිමත් වන්න.

23. දෙදෙනෙකු නිතරම එක සමාන නොවන බව සිතට ගන්න.
  • එකම කූඩුවක සිටින පක්ෂීන් දෙදෙනෙකුගෙන් එක් අයෙකු වැඩියෙන් ශබ්ද කරන බවත්,
  • එකම කූඩුව සිටින සුනඛයින් දෙදෙනෙකුගෙන් එකෙකු වඩා සැරපරුෂ බව තේරුම්ගන්න.
24. ඔබ මෝටර් රථයක් පදවන අවස්ථාවේ , ඉන් බැසීමටවත් , එය තල්ලු කිරීමටවත් නොසිතන්න.

25. දෙවියන් ඔබට නොදෙන දෙයක් මේ මිහිපිට නැත.ඒ කුමක්ද?
     ඒ ඔබට කල හැකි දෙයයි. ඔබට කල හැකි දේ නොකොට දෙවියන්ගෙන් ඉල්ලන්නේ කුමක්ද? ඒ දෙවියන් පවා නොදත් දෙයයි.

26. ඔබට නොවැටහෙන, ඔබට විශ්මිතයි හැගෙන බොහෝ දේ අවසානයට ඔබ තවකෙකු පිට පටවනු ඇත. ඉන් සිදුවන්නේ ඔබ විසින් තවත් දෙවියෙකු නිර්මාණය කිරීමයි. එහෙත් ඒ දෙවියන් අවසානයේදී ඔබම බව දන්නේ ඉතා ස්වල්ප දෙනෙකු පමණක් බව මතක තබාගන්න.

27. කෙනෙකුගේ සේවය අවතක්සේරු කිරීමත්, තමන්ගේ සේවය හැමවිටම ඉස්මතු කිරීමත් නිසා බොහෝ දෙනා ඔබ අතහැර යන බව තරයේ සිතට ගන්න.

28. දිනකට අඩු තරමේ පැය භාගයක්වත් ව්‍යායාම්වල යෙදෙන්න. අඩුම තරමේ කිලෝමීටර් දෙකක්වත් පයින් ගමන්  කරන්න. ගත ලෙඩවීම සිත ලෙඩවීමට එක් හේතුවක් බව සිහි තබාගන්න.

29. බුදුන් වහන්සේට ජීවක නම් වෛද්‍යවරයෙකු සිටි බව අමතක නොකරන්න. හාස්කමින් ලෙඩ සුව කරන්නේ නම් , කිසිදාක වෛද්‍ය විද්‍යාව මෙලොව බිහි නොවන බව සිතට ගන්න.

ඉතිං හැමෝම මේ ලිපි දෙක කියවලා යම් දෙයක් ජීවිතයට ගත්තනම් ඒක ගැහැනු ළමයි ලියන අපි හැමෝටම ලොකු සතුටක්........

උපුටා ගැනීම: සුනිල් රෝහණ මහතාගේ ‍''හොද ළමයෙක් වෙන්න දුවේ" කෘතියෙනි....

Monday, August 20, 2012

කාන්තාව රැකියාවක් කල යුතුද? නැද්ද?


කාන්තාව... කාන්තාව කියන්නෙ ඉතින්, සමාජෙ ජීවත් වෙන මිනිස්සු අතර නිතර අවදානයට ලක්  වෙන කෙනෙක්නෙ..මේ නිසාම විවිධ චෝදනා වලට ලක්වීම, දෝෂාරෝපණයට ලක්වීම, තාඩන පීඩන වලට ලක්වීම ,නින්දාවට පත්වීම විතරක් නෙවෙයි, ආකර්ෂණයට, ගෞරවයට වගේම ආදරයටත් කාන්තාව හසු වෙනවා...

ඒ වගේම ඈත අතීතයේ ඉඳන්ම කාන්තාව, එහෙමත් නැත්තම් ගැහැනිය මුල් කරගෙන විවිධ දේවල් නිම වෙලා තියෙනවා. කලා නිර්මාණ බොහෝමයක් පාසා කාන්තාවගේ මූලිකත්වය මත ,කාන්තාව මුල් කරගෙන නිම වෙලා තියෙනවා. කවි කතාන්දර වගේම විවිධ ආප්තෝපදේශ පවා කාන්තාවන් වෙනුවෙන් කියැවිලා තියෙනවා.. මේ විදියට කාන්තාව මේ අපේ රටේ, මේ සමාජය ඇතුලේ විවිධ භූමිකා තුළින් ඉස්මතුවෙලා තියෙනවා. අදටත් එය එසේමයි...

ඉතින් දැන් එන්නම්කෝ මාතෘකාවට... මෙහෙම විවිධ අවස්ථාවලදි, විවිධ කාරණා ඔස්සේ කතාබහට ලක්වෙන කාන්තාව, රැකියාවක් කල යුතුද , නැද්ද කියන කාරණාවත් කාලයක් තිස්සෙ නෙවෙයි, අදටත් සමහරු එක එක මතයන් ඉදිරිපත් කරනවා. 

කොහොම නමුත් මොන මතය ඉදිරිපත් වුනත්, තමන්ගෙ පවුල රැකගන්න, දරුවන්ට සැපවත් ජීවිතයක් ලබා දෙන්න, ජීවිතේ ගෙවන්න තමන්ගෙ සැමියාට හයියක් වෙන්න, මේ වගේ නානාවිධ හේතු මත කාන්තාවෝ රැකියා කරන්න පෙළඹෙනවා.(රැකියා කිව්වෙ මේ ලෝකෙ පැරණිතම රැකියාව හැරුනු කොට අනිත් රැකියා. පැරණිතම රැකියාව පැත්තකින් තියලා කතා කරමුකෝ.)

අතීතයේ ඉඳන් අපේ කාන්තාවෝ තමන්ගේ ජීවන වෘතිකාව විදියට, එහෙම නැත්තම් තමන්ගෙ පවුලේ සුගතිය වෙනුවෙන් විවිධ දේවල් කර තිබෙනවා. මුදල් ඉපැයීම වෙනුවෙන් ඔවුන් පැදුරු විව්වා, ලණු ඇඹරුවා, ගොයම් කපන්න, එළවළු විකුණන්න, කිරි විකුණන්න,  ආදි නොයෙකුත් දේවල් කලා. ගමේ ලොකු වලව් වල වැඩ කරන්න, කෑම බීම වර්ග හදන්න  අපේ කාන්තාවෝ අතීතයේ සිටන්ම පුරුදු වෙලා හිටියා. ඒ තමන්ගෙ පවුල ජීවත් කරන්න , ස්වමිපුරුෂයාට හයියක් වෙන්න වගේ හේතු නිසා. අතීතයේ විතරක් නෙවෙයි අදටත් මේ දේවල් කරන කාන්තාවෝ ඕනෙ තරම් ගම් වල ඉන්නවා...

ඒ අතීතයේ.. 
ඒත් අද වෙද්දි ලෝකෙ හුඟාක් දියුණු වෙලා තිබෙනවා.මිනිස්සුන්ගෙ සමාජ ක්‍රමේ නොයෙකුත් වෙනස්කම් වෙලා තියෙනවා. අධ්‍යාපන ක්‍රමය, ජීවන රටාව බොහෝ සෙයින් දියුණුවට පත් වෙලා තියෙනවා. මේ නිසා එදාට වඩා අද තත්වය වෙනස් වෙලා තියෙනවා. අද සමාජයේ පිරිමි ළමුන් මෙන්ම සමව ගෑනු ළමුනුත් අධ්‍යාපනය අතින් ඉදිරියටම යන අතරම, දෙපාර්ශවයම රැකියා ඉලක්ක කරගෙනම ඉගැනීමට පුරුදු වී තියෙනවා. යම්තාක් දුරට ස්වාධීන වෙන්න උත්සාහ කිරීමත් මෙයට හේතුවක් වෙන්න පුළුවන්.රජයේ ආයතන වල, පෞද්ගලික ආයතන වල, කර්මාන්තශාලා වල ආදී ,බොහෝ රැකියා ස්ථාන වල කාන්තා පාර්ශවයේ සහභාගීත්වයක් දැකගන්න පුළුවන්. උගත්කම අතින් ඉදිරියට යන්න උත්සාහ කරන වත්මන් කාන්තාව රැකියාව ලෙසත් උසස් ආයතන ,සමාගම් වල සේවයට පෙළඹිලා තියෙනවා.

ඒත් වර්තමානෙ සමහරුන්ගෙ මතයක් තමයි, කාන්තාවක් රැකියාවක් කිරීම පවුල් සංස්ථාව බිඳවැටෙන්න, දරුවන්ගෙ සෞඛ්‍ය තත්වය, අධ්‍යාපනික මට්ටම,සමාජීය සම්බන්ධතා ආදිය දුර්වල වෙන්න හේතුවක් කියන මතය.

ඇත්තටම ගෙදරක අම්මා රැකියාවකට යනවානම්, දරුවන්ට ඉටුවෙන්න ඕනෙ සමහර යුතුකම් පැහැර හැරෙන්න ඉඩ තියෙනවා. නමුත් එයින් දරුවන් තමන්ගෙ වැඩ කටයුතු තමන් තනිව කරගන්න හැකියාව වර්ධනය කරගැනීමත් සිදුවෙනවා.හැම දේකම දෙපැත්තක් තිබෙන නිසා, මමනම් හිතන්නෙ හොද නරක දෙකම මෙයින් සිදුවෙනවා කියන දෙයයි. නමුත් දරුවෙක්ට අම්ම කෙනෙක්ගෙ රැකවරණය උණුසුම ආදරය ඕනෑම අවදියකදි , අම්මා දරුවන්ගෙන් ඈත් වෙලා සල්ලි හොයන්න අරගල කරන එකනම් ටිකක් අර්බුධකාරී තමා. නමුත් වෙන විකල්පයක් නොමැතිනම් සියළුම දේ දරුවන්ගෙ අනාගත අභිවෘද්ධිය තකා නම්, එතනදි එය සාධාරණය කරන්නත් පුළුවන් නේද?

සමහර ස්වාමිපුරුෂයා අහිමි වුනු ,දරුවන් එක්ක මේ ලෝකෙ තනිවුනු කාන්තාවන්ට වෙනත් පිළිසරණක් නැති තැන ඔවුන් රට රැකියාවක් තෝරගන්න පෙළඹෙන්න පුළුවන්. දරුවන්ට උගන්වන්න, වේලක් නෑර බත් කටක් කවන්න ඔවුන්ගෙ ඒ දහඩිය මහ්න්සියෙන් උපයන සල්ලි වලට පුළුවන්. කන්ද උඩරට වතුකර ජනතාවට වේලක් ඇර වේලක් බඩ පුරවගන්න නම් , අම්මායි තාත්තායි දෙන්නා විතරක් නෙවෙයි, දරුවන්ටත් වතු වල වැඩ කරන්න වෙන අවස්ථා ඇති. බොහොමයක් දුෂ්කර පළාත්වල වැඩිදුර ඉගනත්තෙ නැති, පහසුකම් නැති දුප්පත් පවුල්වල  ගෑනු ළමයි ගාමන්ට් වල රැකියා හොයාගෙන කොළඹ එන්නෙ ආසවට නොවෙන්න පුළුවන්.. ඉගනගන්න නංගි මල්ලිට උදව්කරන්න, අම්මා තාත්තාට වේලක් කන්න හයියක් වෙන්න ඇඳුම් මහන්න කොළඹ ආපු ගෑනු ළමයි ඕනෙ තරම් මේ රටේ ඉන්නවා.

මමනම් හිතන්නෙ ඕනෙම සදාචාර සම්පන්න රැකියාවක්( සදාචාර සම්පන්න බව මනින සාධක මම කියන්න ඕනෙ නෑ නේද? අපේ රටේ මිනිස්සු සදාචාරසම්පන්න බව හිස්මුදුනෙ තියාගෙන ජීවත් වෙන ජාතියක් නිසා.) කරන්න කාන්තාව පෙළබෙන එකේ ලොකුම ලොකු වරදක් නෑ.. තමන්ට, තම්න්ගෙ පවුලට, ජීවිතේට හානියක්, නරකක්, අවැඩක් නොවෙන ඕනෙම රැකියාවක් අවබෝධයෙන් ගෞරවයෙන් කරලා සල්ලි හම්බ කරන් ජීවත් වීම කාන්තාවකට අකැප දෙයක් නෙවෙයි. නමුත් කාන්තාවකට පුලුවන් නම් තම්න්ගෙ පවුල් ජීවිතය, දරුවෝ රැකගෙන,දරුවන්ගේ ස්වාමියාගෙ කටයුතු පැහැර නොහැර, සියලු දේ කළමණාකරනය කරගෙන සහයෝගයෙන් වැඩ කරන්න.....,  මම හිතන්නෙ ඒ තමා කාන්තාවකගේ ජයග්‍රහණය.

සියලුම දේ පවතින්නෙ තමන්ගෙ ක්‍රියාව මතයි. තමන් තමන්ගෙ ජීවිතේ ප්‍රතිපත්ති රැකගෙන, ගෞරවයෙන්, අවංකව කටයුතු කරන්න ඕනෙම කෙනෙක් දන්නවානම්, මම හිතන්නෙ කාන්තාවක් වුනත් , පුරුෂයෙක් වුනත්, කිසිම බේදයකින් තොරව ජීවිතේ සාර්ථක කරගන්න පුළුවන්...

කාන්තාවක් රැකියාවක් කිරීම හොඳද නරකද කියලා තීරණය කරන්න, මත ඉදිරිපත් කරන්න පුළුවන්, ඒ කාන්තාව හා රැකියාව මත වගේම, ඇගේ ක්‍රියාවන්  අනුව කියලායි මම හිතන්නෙ. ඒ මගේ මතය. ඔයාගේ මතය????

Wednesday, August 8, 2012

සදාකාලිකවම....



පවන වී හමන්නම්
ඔබේ විඩා දුරලන්න
ලංවෙලා හිඳින්නම්
ඈත් වී නොමයන්න
සඳක් වී දිලෙන්නම්
ඔබේ ලොවේ තරුවක් වෙන්න
අනේ හිත රිදවලා නම්
එපා වෙන් වී යන්න.............
මී බිඳක් වෙන්නම්
දෙතොලතර මිහිරක් වෙන්න
සුසුම වී රැඳෙන්නම්
හැමදාම ළඟ ඉන්න
හදවතේ ඉඩ තියෙනවානම්
මලක් වී සුපිපෙන්න
අනේ වෙන් වෙලානම්
කිසිදිනක නොම යන්න.....


Thursday, July 12, 2012

තාත්තා නැති අපිට ,දුක් ගිනි ඇවිළෙන්න එපා!!!!



A Fathers Love for his daughter



මම කාව්‍යා ..ඔන්න මමත් එකතු උනා ගැහැණු ළමයි එක්ක හොදේ.ඉතින් මේ මගේ පළවෙනි පෝස්ට් එක ගැහැණු ළමයින්ට.පළවෙනි එකම ටිකක් දුක්බර සංවේඳී කතාවක්.


ම්ම්ම් අපි මෙහෙම හිතමු තමන්ගෙ තාත්තගෙ එහෙමත් නැත්තන් අම්මගෙ අකල් මරණය ගැහැණු ළමයෙක් කොහොමද දරාගන්නෙ....? එයාට මොනවද දැනෙන්නෙ...?හිතාගන්නවත් බෑ නේද...? හිතා ගත්තත් කොහොම ඒවා වචන වලට හරවන්නද...?ජීවිතේ හොදම වයසෙදි මමත් මේ බියකරු අත්දැකීම ලැබුව.ගල්කිස්ස කනත්තෙ ආදාහනාගාරයේ දුම් බටෙන් තාත්තගෙ සිරුර දැවි දැවී නගින දුම් දකිනකන්ම මම ඒ ඇත්ත පිළිගන්න මැලි උනා.අදත් එතන පහු කරන් යද්දි මට දැනෙන මල මුස්පේන්තු හැඟීම විස්තර කරන්න සිංහල හෝඩියේ මම දන්න අකුරු මදි.ඒ ගැන මම ගොඩක් කතා කරන්න යන්නෙ නෑ එහෙම උනොත් මට මේක ලියාගන්න බැරුව යනවා.

මේ හැම දේම ආයෙ ආයේ මට මතක් උනේ ඊයේ පෙරේදා මගේ හොදම යෙහෙළියකගේ පියාගේ අවමගුලකට සහභාගි වෙන්න මට සිද්ධ උන නිසයි.සාමාන්‍යයෙන් මම අවමගුල් උත්සව හිතා මතාම මඟහරින කෙනෙක් ඒ හේතු දෙකක් නිසා පළවෙනි එක මළගෙවල් වල මල් වඩම් වලින් එන අමුතු සුවඳ (ගඳ )මට දරාගන්න බෑ,අනිත් කාරණේ කවුරුවත් අඬනවා බලන් ඉන්න බැරිකම .මෙන්න මේ හේතු නිසා මළගෙවල් වලට මගේ සහභාගිවීම බොහොම අඩුයි.ඒත් මේ නම් නොයාම බැරි එකක්. ඒ නිසා ගියා.මළගෙදරක උච්චතම අවස්ථාව මිනිය ගෙදරින් එලියට ගන්න මොහොත හා භූමදානය හෝ ආදාහනය කරන මොහොත. මෙහෙත් ඒකේ වෙනසක් තිබුනේ නෑ.අඬල දොඩල හෙම්බත් වුන මගෙ යාලුවට හරියට සිහියක් පතක්වත් තිබුනේ නෑ.මම එයා තුලින් දැක්කෙ මාවමයි.මං වගේම තවත් ගැහැණු ළමයෙකුට තමන්ගේ ආදරණීය පියා අහිමි උනා නේද කියන හැඟීම මගේ ඉහ මොළ පසාරු කරගෙන ගියා.

ජීවිතෙ හොදම වයසෙදි දරුවෙකුට තාත්තෙක් අහිමි වෙනවා කියන්නේ සුලුපටු කාරණයක් නෙවෙයි.විශේෂයෙන්ම ගැහැණු ලමයෙකුට පියාගේ අත්වැල , රැකවරණය ආදරය අහිමිවෙනවා කියන්නෙ ජීවිතේ හරි අඩක් නෑ ..එහෙමත් නැත්තම්,සම්පූර්ණයෙන්ම කඩාවැටුණා හා සමානයි.කාලෙත් එක්ක දුක තුනී වෙනවා කඳුළු වේලෙනවා තමයි ..ඒත් ,දරුවෙක්ට අම්මෙක් තාත්තෙක් නැති අඩුව වෙන කාගෙන්වත් වෙන කොහෙන්වත් සම්පූර්ණ කරන්න බෑ. ඒක තමා ඇත්තම ඇත්ත.

ඉස්කෝලේ උසස්පෙළ පංති වලදීත් අනිත් සේරම වැඩ පැත්තක දාලා මගේ තාත්ත මාව එක්ක යන්න හරියට 1.30 වෙද්දි ඉස්කෝලෙ ගේට්ටුව ගාව හිටිය.මගේ බෑග් එක එයාගෙ කරට දාගෙන අතින් අල්ලලා මාව පාර පැන්නුව.එහෙව් තාත්තා මාව ඒ අතින් අල්ලලා පෝරුවට නග්ගන්න ඉන්නෙ නැතුව ඉක්මනටම යන්න ගියා.මහ ලොකු කෙල්ලෙක් වෙලත් තාත්තගෙ කකුල් දෙක උඩ නැගල ඔන්චිලි පදිද්දි " දැන් ඔයා බරයි මේවා කරන්න බෑ මගේ මුණුබුරෙක්ව හරි මිණිබිරියෙක්ව හරි තමා ආයෙත් මෙහෙම උඩ දාන්නෙ " කියල හීන මවපු එයා ඒ හීනේ එළි නොකරගෙනම යන්න ගියා.

දරුවො කොච්චර උස්මහත් උනත් දෙමාපියන්ට එයාලා පුංචි දරුවන් ගානයි.සමහර අවස්ථාවලදී "දැන් ඔයා ලොකුයි ඕවා තනියම කරගන්න පුලුවන් වෙන්න ඕනෙ " කියන එයාලම තමා සමහර තැන් වලදී " තාම පොඩි උන් ඔයාලට මේවා කරන්න බෑ " කියන්නේ.එකම වයසෙදි විවිධ අවස්ථාවලදි කොහොමද මෙහෙම ලොකු වෙන්නෙයි පොඩි වෙන්නෙයි කියල ඉස්සර මම තාත්තා එක්ක තර්ක කරල තියෙනව. ඒත් දැන් මම දන්නව ඒ ආදරේට කියල.හැම තැනකදිම එයාල බලන්නෙ අපිව නපුරෙන් බේරන්න. අපිව ආරක්ශා කරන්න.

හැම තාත්තෙක්ටම තාත්තෙක් උන පළියටම ආදරණීය තාත්තෙක් වෙන්න බෑ, ප්‍රශංශා ලබන්න බෑ ,දරුවන්ගේ හිතේ සදාකාලයටම ජීවත් වෙන්න බෑ.එහෙව් තාත්තෙක් වෙන්න වගේම ,එහෙව් තාත්තෙකුගේ දරුවෙක් වෙන්නත් වාසනා කරන්න ඕනෙ.මම එහෙම වාසනාවන්ත ගැහැණු ළමයෙක් .මගේ පියා එහෙම වාසනාවන්ත පියෙක්.

මම මෙතනදී විශේෂයෙන් තාත්තා ගැන කතා කලාට අම්මා කෙනෙකුගේ වියෝවත් මේ හා සමානයි.ගැහැණු ළමයෙකුට සමහර විට ඒ අහිමිවීම තාත්තෙකුගේ අහිමි වීමටත් වඩා බරපතල වෙන්න පුලුවන්.මොකද ගැහැණු දරුවෙක් ළඟින්ම ඉන්නේ අම්මා. ඒ යෝධ හෙවනැල්ල ජීවිතෙන් ඈත් වෙලා ගියොත් කාටද ඒ අඩුව පුරවන්න පුලුවන් ...? මිහිතලය කම්පා වෙන්න ඇඬුවත් හැපුනත් ඒ වේදනාව කෙලවර වේවිද...?

සමහර දෙමාපියන් දරුවන්ගේ ලෝකයෙන් මේ විදියට සදහට සමුගෙන යනවා.ඒ වගේම තමයි සමහර දෙමාපියන් දරුවන්ගේ සැපත සතුට වෙනුවෙන්ම එයාලගෙන් දුරස් වෙලා දේස දීපංකරේ ගිහින් මුදල් හම්බකරනවා.දෙරටක තනිවෙච්ච ඒ මව්පියන්ගෙ , ඒ දරුවන්ගෙ හිත් වල මොන තරම් ගින්දරක් ඇවිලෙනවා ඇද්ද..?අඩුම තරමේ සිංහල අවුරුද්දකටවත් එක මේසෙ වාඩි වෙලා එකට කිරිබත් කෑල්ලක් කන්න තරම්වත් වරම් නැතුව හූල්ලන ඒ ආත්ම කොයි තරම්නම් හිතින් වැලපෙනව ඇද්ද...?ඒත් එයාලා යම් තරමකට හරි වාසනාවන්තයි. මොකද දෙපැත්තක හිටියත් එකම ඉරක් එකම හඳක් යට එයාලා ඔවුනොවුන් වෙනුවෙන් හුස්ම ගන්නවා.

උපන්නොත් කෙනෙක් දිනෙක මේ මහ පොලවට පස් වෙනවාමයි... ඒක තමා බුදු බණ... ඒක තමා ලෝක සත්‍ය.මරණයේ දුක මිය යන්නාට නොව ජීවත් වන්නාටයි.ඒක මොන තරම් දුක උනත් නියම හපන්කම ඒ කෙනා වෙනුවෙන්ම හැපි හැපී ජීවිත කාලෙම හීල්ලීම නොවේ.ඒ කෙනා වෙනුවෙන් ජීවත් වීමයි.ඒ කෙනා ජීවත් කරවූ අය ජීවත් කරවීමයි.

ඉතිං එහෙම හිතෙ හයියෙන් ජීවත් වෙන අම්මා තාත්තා අහිමිවුණ ඕන තරම් දිරිය දියණියෝ මේ රටේ ඉන්නවා..මේ ලෝකේ ඉන්නවා... ජීවිතේ කියන්නේ හිමිවීම් විතරක් නෙවෙයි.. ජීවිතේ කියන්නේ බැඳීම් විතරක්ම නෙවෙයි.අහිමිවීම් තියෙන්න පුලුවන්... බැඳීම් ලෙහෙන්න පුලුවන්...ජීවිතේ අත්වැල ගිලෙහෙන්න පුලුවන්...ඒ හැම දේම සම සිතින් විඳ ගෙන ජීවිතේට මුහුණ දෙන ගැහැණු ආත්ම මොන තරම් ඇද්ද...
නැතිවෙච්ච තාත්තා වෙනුවෙන්, නැතිවුනු අම්මා වෙනුවෙන් ඇස් වල කඳුළු හංගගෙන , ජීවිතේ දිනන සටන මෙහෙයවන දිරිය දියණිවරු මොන තරම් ඉන්නවාද.. ඒ අය හැම අම්මෙක් තාත්තෙක්ටම ආශිර්වාදයක්...අම්මා අහිමි පවුලට අම්මා වෙච්චි දුවලා , අම්මා අහිමි මල්ලිට අම්මාගෙ සුවඳ බෙදන්න උත්සාහ කරන අක්කලා ලෝකෙටම සම්පතක්... තාත්තා නැති පවුලෙ බර කරට අරන්, තාත්තාගෙන් දුවට වෙන යුතුකම් ඉටු කරන්න නැහෙන අයියලාත් ආදර්ශයක්!!!

අවසාන වශයෙන්,ජීවිතේ හැටි එහෙමයි... මොන දුකක්, මොන කරදරයක්, මොන බාධකයක් ආවත්, මහ මුහුද තරම් කඳුළු ඇස් වලින් ගැලුවත්, ගැහැනු හිත් වල හයිය කොයි මොහොතක හරි මතු වෙනවා.. එහෙම මතුවෙන ශක්තියෙන්, ඒ හයියෙන්, ජීවිතේ හුඟාක් දුර යන්න පුළුවන්...

ඉතින් ලියන්න තව බොහේ දේ තිබුනත් මම මෙතනින් මේ පෝස්ට් එක නවත්තනවා.ආයෙ දවසක මේ ගැන කතා කරනන් පුලුවන් කමක් තිබුනොත් අපි කතා කරමු.අවසානයේ මගේ එකම පැතුම වන්නෙ මෙයයි... මට වගේ , මගේ යෙහෙළියට වගේ ,කිසිම දරුවෙකුට ,කිසිම දියණීයකට, ගැහැනු ලමයෙකුට ,අකාලයේ පිය සෙනෙහස අහිමි නොවේවා!!!










Tuesday, July 10, 2012

ඔයාට, මට, එයාට අයිති නුඹ....




හැම දරැවෙක්ම හෙළන් ඇති
හැම ගැහැණියක්ම නාස්ති කරලා ඇති
හැම පිරිමියෙක්ම සඟවන්න ඇති
හැම කෙනෙක්ම වට්ටලා ඇති
මක්නිසාදයත්
එය කිසිවකුට අමුත්තකු නොවන නිසා...
ආදරයට
සතුටට
වේදනාවට
දුකට
එය උරැම නිසා...
මෙලොව උපදින්නටත් පෙරත්
මරණයෙන් පසුත්
ජිවිතය පුරා අප අතර
සැරිසරන
සැම මිනිස් නෙතක්ම
එහි රස ගුණ හදුනන්න ඇති





කඳුළු











Tuesday, July 3, 2012

හොද ළමයෙක් වෙන්න දුවේ.....01



බට්ටි මහ හුගක් ආදරේ කරන පොතකින් තමයි,මේ අද බට්ටි ලියන දෙවෙනි පොස්ට් එක සරසන්නේ. ඒ පොතේ හැම අකුරක් අකුරක් ගානෙම තියෙන්නේ ගැහැනු ළමයින්ට වැදගත් දේවල්.ජීවිතේට, අනාගතේට ගැහැනු ළමයෙක්ට හුඟාක් වටින කරුණූ ගොඩාරියක් ඒ පොතේ අන්තර්ගත වෙලා තියෙනවා.

ගැහැනු ළමයෙක් හදලා සමාජයට දෙනවයි කියන්නේ මුළු රටක්ම ගොඩගත්තා කියන එකයි." තොටිල්ල පදවන අත ලොව ආණ්ඩු කරයි" කියලා කියමනකුත් තියෙනවනෙ. ඉතින්,ගැහැනු ළමයින්ගේ ප්‍රාර්ථනා මල් ඵල ගන්වන්න ,මේ උපදෙස් ටික වැදගත් වෙයි කියලා බට්ටි හිතනවා.

1. ඔබ ස්වභාව ධර්මයට එකතුවෙන්න
උසට වැඩුනු ගස් කොලන් ..... පෙරී එන පිරිසිදු වාතය ..... නිල් තණබිම් ..... කදුහෙල් , මිටියාවත් , පිපී විකසිත වන මල් ..... පෙතිවල රැදෙන පිණිබිදු ..... සිහින් හිරු රැස් ..... අහස උසට නැගෙන සිහින දුමාරය .... ගලා යන තුෂාරය ..... ශිත පින්න ..... මේ හැම දේකින්ම ඔබේ ජීවිතය වර්ණවත් කරන්න. ඔබට අධ්‍යාත්මික සුවය ලඟාකර ගැනීමටත් සිතට එන පීඩනය අවම කර ගැනීමටත්, මානසික විවේකය ලබා ගැනීමටත්, මේ හැම දෙයක්ම ඉවහල් වෙන බව සිතට ගන්න.


2. ජීවිතය දෙස මේ කරුණු තුලින් එබී බලන්න
කහපාට වෙන විට , ඉදුනු ගෙඩි, ගස්වල කොල , බිමට හැලෙන බව.
සිහින් පින්න බිමට වැටී නොපෙනී යන බව.
ලස්සන රෝස මල් පෙත්තක හිමිදිරියේ වැටුනු පිනිකැටය දියවී යන බව.
කවුළුව අද්දර ඊයේ පිපුනු ලස්සන මල හෙටකදී පරවී යන බව.
ආදර හැම කෙනෙක්ම , හැම දෙයක්ම , කවදා හෝ අපෙන් ඈත්වන බව.


3. යථාර්ථය දකින්න පුරුදු වෙන්න.
අප මුහුදු වෙරළේ ගමන් කරන විට දකින සුදුවන් පෙණ පිඩු සහිත රළ අතට ගත්තොත් ,අතෙහි ඉතිරි වන්නේ වතුර පමණක් බව.
ඈතදී දකින ගිණි වළල්ලේ ඇත්තේ වළල්ලක් නොව, ගිණි පෙනෙල්ලක් බව
හැම දෙයකම , හැම ගැටළුවකම පෙනෙන පැත්තට වඩා යථාර්ථවාදීව නොපෙනෙන පැත්තක් ඇති බව.


4. ජීවිතය ජීවත් කරවන්න, එය ගගක් සේ ගලා යාමට ඉඩ දෙන්න.
මනුෂ්‍ය ජීවිතයක වටිනාකම තක්සේරු කරන්න බැහැ. අංග විකල නොවූ (ඇස්,කන,අත පය , මනස) ජීවිතයක් ලබාගන්න , අපි මොනතරම් පින් කරන්න ඕනද? ඒ නිසා ඒ වගේ වාසනාවන්ත ජීවිතයක් ලැබූ අපි ඒ ජීවිතය රැකගන්න කොයිතරම් මහන්සි විය යුතුද? කැපකිරීම් කල යුතුද ? අන්න ඒ ටික හිතට ගන්න. ඒ නිසා ඒ වගේ වටිනා ජීවිතයක් විනාශ කරන සියළුම ප්‍රවේගකාරී බලවේගයන්ගෙන් ඈත්වෙන්න. සියළු බාධක ජයගෙන පහලට බැස යන ගඟක් සේ ජීවිතයට ගලායන්න ඉඩදෙන්න.

5. ජීවිතය සුන්දරය
සුන්දරත්වය හැම විටම ජීවිතයට එක්කර ගන්න. එය කවුළුව අද්දර සිට ශිත කදුකරය දෙස බලමින් සෙමින් සෙමින් තොල ගාන පළතුරු යුෂ බදුනක් සේ සිතා සියමු මිහිරකට එක් කරන්න. ජීවිතය මිහිරි ගීයක් සේ සලකා හැකි හැමවිටම ආසාවෙන් ගයන්න. 


6. අසුබවාදී සිතුවිලි සිත තුලින් ඈත්කර දමන්න.  
ක්‍රෝධය , දේවේශය , මෝහය , තණ්හාව අපේ සිත ලෙඩකරන විෂබීජය. මේ විෂබීජ‍ බොහෝ දුර‍ට අපේ සිත තුල පහල කරන්නේ විෂමාචාර සිතුවිලිය. එහෙයින් , අප යුද්ධ වැදිය යුතු සතුරන් සේ සලකා මේ විෂබීජ තුරන්කර දැමීමට සටන් කරන්න.

7. දවසේ වැඩ ඉතා උනන්දුවෙන් , උද්යෝගිමත්ව පටන්ගන්න
එවිට ඒ සියල්ල ආසාවෙන් කෙළවර කළ හැකිය.
අද දවසේ වැඩ සියල්ල අදම ඉටුකරන්න.
නිදහසට කරුණු දක්වනවාට වඩා එය කෙතරම් අගනේදැයි නිතරම සිතන්න.

8. ඔබ කරන හැම ක්‍රියාවකටම වටිනා තක්සේරුවක් දෙන්න
පළමුව පොත් මේසය අස්කරන්න.
දෙවනුව කාමරය අස්කරන්න.
ඔබ කරන දෙයක ප්‍රතිඵලය හැකි සැමවටම හොද නරක දෙක තුළින් තක්සේරු කොට හොද දේ ජීවිතයට එකතු නරක දේ තුළින් තව තවත් පාඩම් ඉගෙන ගන්න.
ජය පරාජය දෙකටම එකසේ නොසැලී මුහුණ  දෙන්න. ජයග්‍රහණයේදී අත්පුඩි සලන්න. පරාජයේදී තවත් එක් පාඩමක් ඉගෙන ගෙන එයද ජය මාවතක් වෙත යොමු කරන්න.

9. සැමවිටම ඔබ , ඔබ ගැනම විශ්වාසය තබන්න.
ඔබට කල නොහැකි දෑ ගැන සිතනවාට වඩා ඔබට කල හැකි දෑ ගැන සිතන්න. එසේම කිසිදාක නොවෙන දේවල් ගැන සිතමින් අහස් මාලිගා තනනවාට වඩා සැබෑ ලෝකය මත පුංචි ගෙයක් හෝ තනන්න උත්සාහ ගන්න.


10. අන්‍යයන්ගේ අදහස්වලට ඇහුම්කන් දෙන්න.
ඔබ දේශකයකුවීමට සිතන්නට කලින් ජනප්‍රිය අසන්නෙකුගේ තත්වයට පත්වෙන්න. ඔබ වඩාත් හොදින් අසන්න. ඔහු / ඇය වඩාත් ඔබගේ ජීවිතයට ලංවන බව සිතන්න.


11. ඔබට සතුරන් ඇති බව නිතරම සිතන්න
මෙම සතුරන් වඩාත්ම අරක්ගෙන සිටින්නේ ඔබගේ සිත තුලම බව වටහාගන්න. උදාසීනත්වය, අලසකම . වැඩ කල්දැමීම , මෙම සතුරන් අතර සිටින ප්‍රධාන සතුරන් බව බුද්ධියෙන් වටහා ගන්න.


12. ඔබට වේදනාවක් දැනු‍නහොත් , දුකක් දැනුනහොත් දෑසින් කදුළු හැකිතරම් පිටකරන්න.
වේදනාව හදවත තුලත් , සිත තුලත් තෙරපාගෙන සිටීමෙන් ඇතිවන පීඩනය ඔබගේ මුළු ගමත රෝගී කිරීමට හැකි බව නිතරම සිහියට නගාගන්න. වේදනාව තුනීකර ගැනීමේ හොදම ඖෂධය වන්නේ කදුළුය. එසේම එම වේදනාවට හේතුව ඔබ ඔබේ හොදම යෙහෙළියට පවසා සිත සැහැල්ලු කරගන්න.


13. ස්වභාව ධර්මයේ මේවා රැදී තිබෙන බව සිතන්න. ඒවා ඔබට පමණක් අයත් දේයැයි නොසිතන්න.

ලා‍භය               අලාභය                         කීර්තිය                          අපකීර්තිය


14. ඔබට අත දෙන්නට සුර දූතයෝ මෙහි නැති බව සිතන්න. 
ඔබේ සිත් වේදනාවට හේතුව ඔබම සොයාගන්න. සිතට විවේකය ගන්න. පරිසරය වෙස් කරන්න . ඔබ මුළුමනින්ම පීඩනය කල අදහස් මොහොතකට අමතක කොට දමා වෙනත් මගකට ‍සිත යොමු කරන්න.


15. ඔබේ ශක්තිය , බලය ගැන නිරම සිහියට නගන්න. එය කිසිවෙකුට පාවා නොදෙන්න.
මෙතෙක්  ‍ලෝකයේ සියළු විස්කම් කලේ දෙවියෙකු නොව මිනිසෙකි. මිනිසා වුවද අන්ධයෙකුට දෙවියෙකු ලෙස දැකිය හැක. මිනිසා මැවූ දෙයට සාක්ෂි ඇතත් , දෙවියෙකු මැවූ දෙයට ඇත්තේ විශ්වාසයක් පමණි. ලොව පාලනය කරන්නේද මනුෂ්‍යයෙකි. දෙවිවරුන්ට පවා බණ කීයේ මනුෂ්‍යයෙකි. නිවන් මග දුටුවේ මනුෂ්‍යයෙකි. එසේ නම් නොපෙනෙන දෙවියෙකුගේ බලයට වඩා මනුෂ්‍යයෙකු සතු බලය අසීමිත බව සිතන්න.


16. දෙවියන්ගේ දේවාලවලින් මේ රට හිස්ව නැත. එහෙත් එහි වෙසෙන මනුෂ්‍යයින්ගේ සිත් සතන් හිස්ය. දෙවියන්ගේ උද්‍යනයේ මල් කඩන්නට අපට අවසර නැත. එහෙත්  එහි මල් වවන්නට අපට අවසර ඇත. අපි ඔවුන්ගේ පුදසුන රකින්නේ අපේ පුදසුන හිස්ව තබාගෙන බව අමතක නොකරන්න. 


උපුටා ගැනීම: සුනිල් රෝහණ මහතාගේ ‍''හොද ළමයෙක් වෙන්න දුවේ" කෘතියෙනි....

ඉතිරිය ඊලග ලිපියට........